„თორნიკე ერისთავი“ – პერსონაჟი და მისი მახასიათებლები

პედაგოგი: ანა მელაძე, ვარლამ ძიძიგურის სახელობის ხონის მუნიციპალიტეტის სოფელ მათხოჯის საჯარო სკოლა

საფეხური, კლასი: საბაზო, მე-7 კლასი

სამიზნე ცნება: ტექსტის გაგება

შედეგები:  5, 7, 9, 10, 11

საკითხი: პერსონაჟი და მისი მახასიათებლები, სიუჟეტი, ტექსტის კონტექსტი, ფაქტი და მოსაზრება / დამოკიდებულება. ტექსტი: აკაკი წერეთლის პოემა „თორნიკე ერისთავი“, მეოთხე კარი – პოემის ფინალი, დავით კურაპალატისა და თორნიკე ერისთავის შეხვედრა მტრის დამარცხების შედეგ.

კომპლექსური დავალების პირობა: 

აკაკი წერეთლის პოემა „თორნიკე ერისთავის“ მეოთხე კარის მიხედვით Minecraft-ში შექმენი სამყარო, რომელშიც წარმოდგენილი იქნება პოემის ფინალური ნაწილის გარემო და სიუჟეტი (ამბავი).

თქვენ მიერ შესრულებულ დავალებაში ხაზგასმით წარმოაჩინეთ:

1. ბრძოლის ველიდან მომავალი გამარჯვებული ქართველთა ჯარი;
2. თორნიკე ერისთავისა და დავით კურაპალატის შეხვედრა მეფის სასახლეში მტრის დამარცხების შემდეგ, მათი საუბარი;
3. უცხო ბერების გამოჩენა;
4. ათონის მთაზე ქართველთა მონასტერი და იქ განვითარებული მოვლენები.

დავალების პრეზენტაციისას უპასუხე შეკითხვებს:

1. იმსჯელე, ვის ეკუთვნის განძი, რომლის მიღებაზე უარს ამბობს თორნიკე ერისთავიც და მეფეც;
2. ახსენი, შენი აზრით, ვინ არიან უცნობი მოხუცები,  საით მიემართებიან ისინი და დაასაბუთე, რატომ ფიქრობ ასე;
3. გამოთქვი ვარაუდი, რატომ არის დაშორებული პოემის ფინალი  ისტორიულ რეალობას.

დავალების წარდგენის შემდეგ ისაუბრე:

1. როგორ შეარჩიე ან შეადგინე „სიტყვის ღრუბლებში“ ჩასაწერი მასალა?
2. რას შეცვლიდი, თავიდან რომ დაიწყო დავალების შესრულება?

პრაქტიკული რჩევები კომპლექსურ დავალებაზე მუშაობისთვის:

• დაყავი პოემის მეოთხე კარი ეპიზოდებად; გაითვალისწინე, რომ პოემა დაყოფილია თავებად (ეპიზოდური სცენები ლოგიკურად  გამოყავი ერთმანეთისგან);
• დააკვირდი, რამდენი პერსონაჟი მონაწილეობს  თითოეულ ეპიზოდში, რას აკეთებენ, რას ამბობენ, სად იმყოფებიან.
• გაითვალისწინე, სად და როდის ხდება ნაწარმოებში აღწერილი ამბავი;
• ამბის გადმოსაცემად გამოიყენე პერსონაჟების ნათქვამი სიტყვები და ისინი აუცილებლად დაურთე წარმოდგენილ სცენებს.